Ukrayina Silâlı Quvetleriniñ Baş Ştabı Qırımnıñ ğarbiy yalısındaki Olenivka yanında erteden haber berüv radar stansiyasına ücüm yapılğanı aqqında haber etti. Bu aqta beyanat agentlikniñ içtimaiy ağlarındaki saifelerinde yayınlandı.
"Bu gece Rusiye tecavuzcısınıñ arbiy ve iqtisadiy imkânlarını eksiltmek içün areketlerniñ bir qısmı olaraq Ukrayina Mudafaa Quvetleriniñ bölükleri duşmannıñ bir sıra müim arbiy nişanlarını yoq ettiler. Meselâ, Qırımdaki Olenivka yanında erteden haber berüv radar stansiyası yoq etildi", — dep, qayd etile beyanatta.
Ukrayina Silâlı Quvetleriniñ Baş ştabı bu malümatnı tasdıqlamadı. Rusiye arbiyleri iç bir türlü ğayıplar aqqında haber etmediler.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.