ABD prezidenti Donald Tramp fevralniñ 13-nde Beyaz evde bildirdi ki, Ukrayina "cenkniñ bitirilmesi" aqqında kelecek muzakerelerde iştirak etecek.
Jurnalistlerniñ, ukrayinler Tramp memuriyetiniñ Rusiye ile yapacaq muzakerelerinde iştirak etecekmi yoqmı, degen sualine ABD prezidenti: "Ebet, etecekler" dep ayttı.
"Bizde Ukrayina olacaq, Rusiye olacaq, diger insanlar da celp etilecek", — dep qayd etti Amerika devletiniñ yolbaşçısı. Tramp fevralniñ 12-nde Rusiye ve Ukrayina prezidentleri Vladimir Putin ve Vladimir Zelenskıy ile keçirilgen subetlerni "yahşı" dep adlandırdı.
"Birisi, Zelenskıynen birinci laf etmek kerek edim, dep ayta. Amma men böyle tüşünmeyim. Rusiye añlaşmaq istey ya da istemey, bunı bilmek kerekmiz. Zelenskıy añlaşmaq istegenini bilem, çünki maña bunı ayttı. Şimdi bilem ki, Rusiye de añlaşma yapmaq istey", — dep bildiridi ABD prezidenti.
Kiçik aynıñ 12-nde ABD prezidenti başta Rusiye lideri Putin, soñra ise Ukrayina prezidenti Volodımır Zelenskıy ile telefon vastasınen laf etti.
O, Putin ile telefon subetinden bir qaç saat keçken soñ Beyaz evde jurnalistlernen laf etti, Trampnıñ aytqanına köre, olar Rusiyeniñ Ukrayinağa qarşı alıp barğan cenki boyunca barışıq muzakerelerini başlamağa añlaşqanlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
