Rusiyeniñ Ukrayinada vatandaş infrastrukturasına qarşı açqan ateşi neticesinde 1222 bala bağçası zarar kördi, 121-i yıqıldı, dep haber etti Ukrayina tasil ve ilim naziri muavini Andriy Vitrenko Ukrayina teleyayınında.
«Bugünki künde 121 bala bağçamız bütünley yıqılğan, 1222 zarar körgen, amma biz toqtamaymız ve yerli akimiyet organlarınen beraber tamir etemiz ve tamir işlerini yapamız. Böyleliknen, 433 bala bağçası endi tamir etildi ve 94 bağçada tamir işleri keçirildi, olar tiklendi», – dep qayd etti Vitrenko.
Onıñ aytqanına köre, mektep aldın müessiselerniñ yañartıluvı halqara ortaqlarnıñ yardımınen keçe.
«Hususan, UNICEF telükesiz tasil müitini yapmağa yardım ete. Ortaqlıq sayesinde bala bağçalarında 63 sığınaq yaptıq, 200-den çoq bağçağa mebel temin etildi», – dedi Vitrenko.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
