Bala meselelerinen oğraşqan prokurorlar Ukrayinada Rusiyeniñ büyük istilâsı neticesinde 618 bala elâk olğanını qayd etti, dep bildirdi aprelniñ 14-nde Baş prokurornıñ ofisi. Haberge köre, eñ az 1884 bala yaralandı.
«Aprelniñ 13-nde Sumı şeerine açılğan ateş neticesinde 11 ve 17 yaşında eki oğlan elâk oldı, 15 bala yaraladı: 1 yaşından 14 yaşına qadar yedi qızçıq, 7 yaşından 16 yaşına qadar sekiz oğlançıq. Aprelniñ 10-nda Jıtomır vilâyetiniñ Özerne qasabasına açılğan ateş neticesinde 13 yaşında qız bala yaralandı. Aprelniñ 10-nda Dnipropetrovsk vilâyetiniñ Nikopol şeerine qarşı ücüm neticesinde 16 yaşında oğlan yaralandı», – dep bildirdi Baş prokuror ofisi.
Aprelniñ 5-nde prokuratura elâk olğan 616 bala ve eñ az 1863 yaralanğan bala aqqında bildirgen edi.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd eteler.
Martnıñ soñunda BM yılnıñ başından Ukrayinada Rusiye istilâsı sebebinden 413 barışıqsever sakin elâk oldı, 2000-den çoq ise yaralandı, dep tasdıqlap oldı – 2025 senesiniñ ilk üç ayı devamında qurbanlarnıñ sayısı keçken seneniñ aynı müddetine köre 30% arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
