Ukrayina Ava quvetleriniñ uçaqquvarcıları Rusiye qırıcısını urıp tüşürgenler. Bunı martnıñ 3-nde Ukrayina komandanlığı haber etti.
"2023 senesi martnıñ 3-nde Yenakiyevo civarında saat 13:30-larda "Cenüp" Ava komandanlığınıñ Nikopol uçaqquvar raketa polkunıñ uçaqquvarcıları tarafından Su-34 Rusiye qırıcısı urıp tüşürildi", - dep yazıla bildirmede.
Ukrayina arbiyleriniñ malümatına köre, eñ az bir pilot elâk olğan.
Evel içtimaiy ağlarda Donetsk vilâyetiniñ işğal etilgen Yenakiyevo şeeri civarında Rusiye uçağı tüşkeni aqqında haber etilgen edi.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
