Rusiye martnıñ 22-ne keçer gecesi Ukrayınağa qarşı 21 dron uçurdı, 16-sı tüşürildi. Bu aqta Ukrayına Silâlı quvetleriniñ Baş ştabı bildire.
Ukrayına arbiyleriniñ qayd etkenine köre, laf Shahed-136 İran kamikadze dronları aqqında kete.
Bundan ğayrı, keçken künü Rusiye ordusı 10 raketa ve 32 avadan darbe endirdi, toplu ateş reaktiv sistemalarından vatandaş obyektlerine 90 ateş açtı.
Yarı gecege yaqın Kyiv ve Ukrayına regionlarında bir qaç saat devam etken ava telüke signalı ilân etildi. Kyiv vilâyetinde akimiyet dronlarnıñ ücüm telükesi aqqında tenbiledi, ava mudafaa küçleri çalıştı.
Kyiv şeer arbiy memuriyeti Kyiv civarında qayd etilgen bütün uçucısızlar yoq etildi, dep bildirdi. Lâkin akimiyet sayılarını aytmadı.
Telüke signalı vaqtında Hmelnıtskıyde patlav sesi aqqında haber etildi. Lâkin yerli akimiyet vilâyette «bir şey kelmedi» ve ava mudafaası çalıştı, dep qayd etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
