Ukrayina öz topraqlarında Rusiye ile munaqaşanı buzlatmaq niyetinde degil. Bunı Ukrayina prezidenti Volodımır Zelenskıy Wall Street Journal CEO Council Summit sessiyası vaqtında bildirdi.
Zelenskıy, BMT-nıñ vatandaşlarnı Mariupolden tahliye etmege tırışqanına baqmadan, şeerniñ ateşke tutulması toqtamamağanına diqqat çekti. O, ateşniñ toqtatılması yalıñız Rusiye prezidenti Vladimir Putin ile körüşkeni taqdirde mümkün olacağını tahmin etti.
"Prezident Putin ile körüşüv olsa, o zaman ateşni toqtatuv rejimi olacaq. Çünki akis aldı körüşüv olmaycaq. Ve o zaman, belki de, şahsen onen añlaşırmız. O, şahsen ateşni toqtatuv içün mesülietli olmalı. Bu da açıq olmalı", - dedi Zelenskıy.
Aynı zamanda, prezident qayd etti ki, ateşni toqtatuv Rusiye ordusınıñ olğan yeride qala bilmesi demek degildir.
"Biz buzlatılğan çatışmağa razı olmaycaqmız", - dedi devlet başı.
O, Rusiyeniñ ateşni toqtatmağa azır olğanını şimdilik körmegenini bildirdi.
Ukrayina Silâlı Quvetleriniñ Baş ştabınıñ malümatına köre, Ukrayinanıñ naqliyat infratekrkibini yoq etmek içün tünevin Rusiye ordusı Dnipro, Kirovograd, Lviv, Vinnıtsâ, Zakarpattâ, Odesa ve Donetsk vilâyetlerindeki obyektlerge raketa darbelerini endirdi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
