Qırımdaki RF ordusınıñ radiolokatsiya stantsiyasınıñ yoq etilmesi aqqında Ukrayina Silâlı quvetleriniñ strategik kommunikatsiyalar idaresi bildirdi.
Bildirilgenine köre, bu Razdolnoye qasabası yanında oldı.
Qırım.Aqiqatnıñ malümatına köre, Razdolnoye qasabasında 85683-r arbiy qısmı yerleştirilgen. Rayonnıñ Rusiye memuriyetiniñ saytında işğalden soñ qasabada radiotehnik ordularınıñ bölügi yerleştirilgen, dep aytıla. Bu ordularnıñ hızmetçileriniñ esas vazifesi - ava istihbaratını alıp barmaqtır.
Saba Rusiye Mudafaa nazirligi işğal etilgen Qırımğa uçucısız uçaqlarnıñ ücüm etkenini bildirdi. Rusiye müessisesiniñ bildirgenine köre, yarımada üzerinde 11 uçucısız uçaq ya toqtatıldı, ya da tüşürildi. Aqyarnıñ Rusiye yolbaşçısı Mihail Razvojayev pilotsız uçaqlardan biri Belbek akvatoriyasında tüşürilgenini bildirdi. Muarririyetniñ Rusiye akimiyetiniñ beyanatlarına dair delilleri yoq.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
