Ukrayina akimiyeti Birleşken Devletlerden silâ ve silâ teminlevini közde tutqan bütün tekliflerni baqmağa azır, dep bildirdi martnıñ 19-nda Ukrayina mudafaası Kontakt gruppasınıñ 20-nci toplaşuvı neticesinde Ukrayina mudafaa naziri Rustem Umerov Azatlıq Radiosına bergen eksklüziv intervyüsında.
"Biz vaziyetimizni ve qabiliyetimizni eyileştirgen er şeyge daima açıqmız, şunıñ içün bu teklifni baqacaqmız, qarar alacaqmız", – dep cevap berdi Umerov, ABD Kongressiniñ spikeri Mayk Johnsonnıñ, Amerika destegi doğrudan yardım şeklinde degil de, lend-liz ya da kredit şeklinde ola bile, degen ğayesine izaat bermege rica etilgende.
The Hill neşriyatınıñ malümatına köre, keçken afta Mayk Johnson cumhuriyet senatorlarına onıñ reberliginde olğan palatada Ukrayinağa yardım aqqında "büyük deñişmeler" olacaq qanun leyhası azırlanacaq, dep bildirdi. Johnson, cumhuriyetçi Mayk Makkol teklif etkenine oşağan bir aletni yaratmaq aqqında da laf etti. O, Rusiye Federatsiyasınıñ suveren aktivlerini tutıp almağa ve olarnı Ukrayinağa qol tutuv fonduna bermege ruhset berecek edi.
ABD Senatı fevralniñ 13-nde gece toplaşuvında Ukrayina, İsrail ve Tayvanğa 95 milliard dollarlıq yardımnı közde tutqan qanun leyhasına qol tuttı.
Qanun leyhası Cumhuriyetçiler çoqluğı olğan Amerika Kongressiniñ Temsilciler Palatası tarafından tasdıqlanmalı. Olarnıñ çoqusı, qanun leyhasını tenqit etken sabıq prezident Donald Trumpnı közde tuta.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
