Ukrayina Mudafaa nazirligi Ukrayina Silâlı quvetleri içün pilotsız uçaqlarnıñ satın alınması içün qoşma 1,1 mlrd grivna ayıra, dep bildirdi dekabrniñ 13-nde Ukrayina baş naziri Denis Şmığal.
Onıñ qayd etkenine köre, bu para brigadalarğa berilecek, böylece olar eñ müim ihtiyaclarnı temin ete bileler.
Umumen bu ayda Ukrayina Mudafaa nazirligi arbiy brigadalarğa 4,3 milliard grivna berecek, 11 ay içinde ise böyle bir para 27,2 milliard grivna oldı, dep qoştı Şmığal.
Bu seneniñ 10 ayı devamında Ukrayina ükümeti Ukrayina telükesizlik ve mudafaa quvetleri içün arbiy tehnika, silâ, mudafaa malzemeleri, mudafaa mahsulatı, şahsiy qoruv vastaları, aşayt malları satın aluvına 229 milliard grivna masraf etkenini bildire.
Bundan evel Mudafaa naziri Rustem Ümerov, Ukrayina Silâlı quvetlerinde pilotsız uçaqlarnıñ sayısı bir yıl içinde yedi qat artqanını bildirgen edi.
Rusiye-Ukrayina cenki vaqtında uçaqlarnıñ rolü bayağı arttı. Cebe çizgisinde olar Rusiye ordusınıñ artilleriyadaki üstünligini eksilteler. Aynı zamanda olar Rusiye territoriyasındaki arbiy obyektlerge yüz kilometr mesafede ücüm etmek içün de kerek oldılar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
