Rusiye mahkemesi tarafından 8,5 yıl apis cezasına mahküm etilgen Ukrayina Arbiy-deñiz quvetleriniñ sabıq kapitanı Oleksiy Kıselev Rusiyeniñ Vladimir vilâyetindeki 2-nci cezahanesinde kamerada bir özü otura eken.
Bunı "Qırım birdemligi" cemaat birleşmesi Kıselevnıñ soy-sopuna atfı etip bildire. Olar Kıselevden qısqa bir mektüa alğanlar. Mektüpte ise anda bulunğanı aqqında yazıla.
Bundan evel Kıselev Aqmescitteki 2-nci SİZO-da tutula edi. Soy-sopunıñ sözlerine köre, sentâbrniñ 18-nde Kıselevni Aqmescitten, sentâbrniñ 21-nde ise Krasnodardan alıp çıqarğanlar. Biraz soñra o Vladimirskiy tsentralğa etap etilgeni belli oldı.
Evel Canköydeki Rusiye mahkemesi işğal etilgen Geniçeskte Rusiye quvetçileri tarafından tutıp esir etilgen Ukrayina Arbiy deñiz quvetleriniñ yedekteki zabiti Oleksiy Kısılevnı Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv qabaatı ile 8,5 yıl apis cezasına mahküm etti.
Rusiye quvetçileri Qırımda Ukrayina Arbiy deñiz quvetleriniñ "Slavutiç" keşfiyat gemisiniñ keçmiş komandanı Oleksiy Kısılevni Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv ile qabaatlap, qaçırdılar. Advokatı Aleksey Ladin bildirgeni kibi Kısılev Rusiye quvetçileri tarafından elektrik aqımı ile iskencelerge oğratılğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
