8,5 yıl apis cezasına mahküm etilgen Ukrayina Arbiy-deñiz quvetleriniñ sabıq kapitanı Oleksiy Kısılev Rusiyeniñ Vladimir vilâyetindeki 2-nci cezahanege etap etilgen. Bunı "Qırım birdemligi" haber ete.
"Anasına kelgen cevapta mahkümniñ cezahanege kelip kelmegeni aqqında yazılmay. Evel yaqınları onıñ bulunğan yeri aqqında bir şey bilmegenlerini bildirgen ediler. Onıñ 2-nci Aqmecsit SİZO-sında Krasnodarğa alıp kettiler. Başqa malümat yoq edi", - dep yazıla bildirmede.
Evel Canköydeki Rusiye mahkemesi işğal etilgen Geniçeskte Rusiye quvetçileri tarafından tutıp esir etilgen Ukrayina Arbiy deñiz quvetleriniñ yedekteki zabiti Oleksiy Kısılevnı Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv qabaatı ile 8,5 yıl apis cezasına mahküm etti.
Rusiye quvetçileri Qırımda Ukrayina Arbiy deñiz quvetleriniñ "Slavutiç" keşfiyat gemisiniñ keçmiş komandanı Oleksiy Kısılevni Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv ile qabaatlap, qaçırdılar. Advokatı Aleksey Ladin bildirgeni kibi Kısılev Rusiye quvetçileri tarafından elektrik aqımı ile iskencelerge oğratılğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
