Evel Kısılev 2-nci sanlı Aqmescit SİZO-sında tutuldı. Soy-sopunıñ sözlerine köre, sentâbrniñ 18-nde Kısılevni Aqmecitten, sentâbrniñ 21-nde ise Krasnodardan alıp çıqarğanlar. Şimdi bulunğan yeri belli degil.
Rusiye qanunlarına köre, SİZO reberligi mahkümniñ yollanğan yeri ve başqa yerge kelmesi aqqında 10 kün içinde soy-sopuna haber etmeli. Tuvğanlarınıñ bildirgeni kibi Ceza icrası Federal hızmetiniñ hadimleri bunı yapmağanlar.
Evel Canköydeki Rusiye mahkemesi işğal etilgen Geniçeskte Rusiye quvetçileri tarafından tutıp esir etilgen Ukrayina Arbiy deñiz quvetleriniñ yedekteki zabiti Oleksiy Kısılevnı Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv qabaatı ile 8,5 yıl apis cezasına mahküm etti.
Rusiye quvetçileri Qırımda Ukrayina Arbiy deñiz quvetleriniñ "Slavutiç" keşfiyat gemisiniñ keçmiş komandanı Oleksiy Kısılevni Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv ile qabaatlap, qaçırdılar. Advokatı Aleksey Ladin bildirgeni kibi Kısılev Rusiye quvetçileri tarafından elektrik aqımı ile iskencelerge oğratılğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
