Oraqnıñ 30-nda Ukrayina arbiy quvetleriniñ telükesizlik hızmeti komandanı Robert Brovdi Qırımğa yapılğan darbeler aqqında esabat berdi.
Videoğa köre, Oraqnıñ 29-nda Rusiyeniñ Snejnoyedeki deñiz pilotsız katerler bazasına ücüm etildi, Oraqnıñ 22-nde ise Ohotniçye rayonında radarlarnıñ sığınaqlarına darbe endirildi.
Bundan ğayrı, Brovdiniñ aytqanına köre, Qırımnıñ energetik obyektlerine darbeler endirilmege devam ete, lâkin qoşma bir de bir malümat ya da video derc etilmedi.
Rusiye arbiyleri bu darbeler aqqında haber etmedi.
Keçende Ukrayina Silâlı quvetleriniñ Baş ştabında, Mejvodnıy rayonında Rusiye Federatsiyasınıñ Qara deñiz flotunıñ hızmet etken katerleri yerleşken yerge ücüm etilgeni aqqında haber etilgen edi.
2022 senesi Armandan başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.