Rusiye quvetçileri Qırımda Ukrayina Arbiy deñiz quvetleriniñ "Slavutiç" keşfiyat gemisiniñ keçmiş komandanı Oleksiy Kisilevnı Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv ile qabaatlap, qaçırdılar. Bunı öz Facebook saifesinde oğlu Artem Kisilev haber etti.
"İyülniñ 22-nde banan dumhuriyetlerniñ temsilcileri babam, Ukrayina Arbiy deñiz quvetleriniñ "Slavutiç" keşfiyat gemisiniñ keçmiş komandanı şimdi ise göñülli ve faal Oleksiy Kisilevnı qaçırdılar. Bir qaç kün devamında qayda tutulğanı belli degil, amma iyülniñ 27-nde o dersiñ Qırım ile memuriy sıñırnı keçken, anda ise onı tutıp Aqmescit SİZO-sına alıp kettiler", dep yazdı o.
Onıñ sözlerine köre, iyülniñ 29-nda Rusiyeniñ nezaretinde olğan mahkeme Oleksiy Kisilevni eki ay tevqifli qaldırğan. Bundan ğayrı, o, babasınıñ alı dögülmesi ve ihtimal iskencelerge oğratılmasına delâlet ete.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
