Rusiye mahkemesi tarafından 8,5 yıl apis cezasına mahküm etilgen Ukrayina Arbiy-deñiz quvetleriniñ sabıq kapitanı Oleksiy Kıselevniñ advokatı mahkeme qararına qarşı temyiz şikâyetini azırlay. Bunı "Suspilnege" Kısılevniñ kelini Mariya Melnikova haber etti.
"Alına kelgende bir şey aytıp olamayım, çünki etap bir ay devam etti, bulunğa yeri, al-evalını bilmey edik. Vladimirskiy tsentralğa kelip çıqqan soñ "Zonatelekom" vastasınen mektüp yolladı. Mektüpte er şey yahşı dep yaza... Amma kene de bu rusiyelilerniñ sisteması, elbette olar er şeyni oquylar ve teşkereler, bunıñ içün adam kerçekni yazıp olamaz bile", - dep qayd etti o.
Kıselev Vladimirskiy tsentralğa etap etilgen soñ soy-sopu ondan eki mektüp alğan.
"Birinci mektüpte Vladimirskiy tsentralğa kelip çıqanı aqqında yazdı. Ekinci mektüp biraz soñra keldi. Anda o, dört kişilik kamerağa avuştırılğanı aqqında yaza. Başta o bir kişilik kamerada tutulğan. FSİN-ge yazğanımız talapqa böyle cevap adldıq: mahküm yıl devamında tek bir yollama, bir banderol ala bile, mektüpler ise sıñırsız miqdarda", - dep qayd etti qadın.
Bundan evel Kıselev Aqmescitteki 2-nci SİZO-da tutula edi. Soy-sopunıñ sözlerine köre, sentâbrniñ 18-nde Kıselevni Aqmescitten, sentâbrniñ 21-nde ise Krasnodardan alıp çıqarğanlar. Biraz soñra o Vladimirskiy tsentralğa etap etilgeni belli oldı.
Evel Canköydeki Rusiye mahkemesi işğal etilgen Geniçeskte Rusiye quvetçileri tarafından tutıp esir etilgen Ukrayina Arbiy deñiz quvetleriniñ yedekteki zabiti Oleksiy Kısılevnı Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv qabaatı ile 8,5 yıl apis cezasına mahküm etti.
Rusiye quvetçileri Qırımda Ukrayina Arbiy deñiz quvetleriniñ "Slavutiç" keşfiyat gemisiniñ keçmiş komandanı Oleksiy Kısılevni Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv ile qabaatlap, qaçırdılar. Advokatı Aleksey Ladin bildirgeni kibi Kısılev Rusiye quvetçileri tarafından elektrik aqımı ile iskencelerge oğratılğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
