Rusiye ordusı noyabrniñ 5-ne keçken gecesi ücüm vaqtında Ukrayinağa 79 arbiy uçucısız uçaq yolladı, dep bildire salı künü saba Ukrayina Ava quvetleriniñ komandanlığı.
Uçaqlarnıñ uçuşları Brâansk, Kursk ve Orl yönelişlerinden yapıldı. Arbiylerniñ malümatına köre, RF ordusı Odesa vilâyetinde Qara deñizden eki X-59/69 idare etilgen aviatsiya raketalarını da uçurdı.
"Saat 08.30 itibarınen eki X-59/69 idare etilgen aviatsiya raketaları ve 48 duşman dron Odesa, Kıyiv, Sumı, Poltava, Jıtomır, Çerkası, Çerniğiv ve Hmelnıtsk vilâyetlerinde urulğanı tasdıqlandı", — dep aytıla haberde.
Ukrayina komandanlığı qoşa ki, 30 Rusiye uçucısız uçağı Ukrayinanıñ farqlı regionlarında ğayıp oldı, daa bir uçaq Rusiyege qayttı.
Malümatqa köre, ava ücümini zenit raketa orduları, aviatsiya, radioelektron küreş bölükleri, Ava quvetleri ve Ukrayina mudafaa quvetleriniñ mobil ateş grupaları qarşılağan.
Hususan, Kıyivde noyabrniñ 5-nde saba ava mudafaası çalıştı.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
