Rusiye ordusı saban ayınıñ 3-ne keçken gecesi Ukrayinağa 136 çeşit pilotsız uçaqnı uçurdı, dep bildire Ukrayina Arbiy-ava quvetleriniñ komandanlığı. Uçaqlarnı Kursk, Primorsk-Ahtarsk yönelişlerinden ve ilhaq etilgen Qırımnıñ Sarabuzdan uçurğanlar.
Ukrayina arbiyleri qayd eteler ki, ava ücümini aviasiya, zenit raketa ordusı, radioelektron küreş bölükleri ve pilotsız sistemalar, mobil ateş gruppaları qaytarğan.
"İlk malümatqa köre, ava mudafaası memleketniñ şimalinde, cenübinde ve şarqında duşmannıñ Shahed, Gerber, Italmas ve diger tiplerniñ 127 UAV-ını urdı", — denile beyanatta.
Ava quvetleri üç yerde beş urıp tüşürilgen uçaqnı ve üç yerde tüşken uçaq parçalarını qayd etti.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.