Canköydeki Rusiye arbiy uçaq alanı rusiye arbiyleriniñ qullanğan yerlerden biridir. Bunı noyabrniñ 17-nde Arbiy ava quvetleriniñ spikeri Yuriy İgnat bildirdi.
Böylece, o, noyabrniñ 17-nde Canköyde yüz bergen patlavlarnı izaatladı.
"Çornobayivka artıq azat etilgenini bilemiz, amma daa Çaplınka bar, o artıq bizim artilleriyamizniñ elindedir, şunıñ içün Canköydeki uçaq alını, belki de Melitopol ile beraber ücümler yapqan ve işğalcilerniñ qara ordusına destek bergen Rusiye helikopterleri içün qullanıla, buña köre, anda pamuqlarnıñ olması mümkün", - dedi o.
Onıñ sözlerine köre, uçaq alanınıñ özü ve onıñ infraterkibi müim olsa da, anda yerleşken ve "büyük zarar ketirgen" aviatsiya tehnikası daa da müimdir.
"İşğalciler öz uçaqlarını yerleştirmek içün Canköyden ğayrı Qırımda daa beş uçaq alanını qullanalar", - dedi o.
Aynı zamanda, Ukrayina Arbiy ava quvetleriniñ temsilcisi Canköydeki patlavlarğa Ukrayina arbiyleriniñ alâqsı olğanına dair tahminlerni ne tasdıqladı, ne de red etti.
"Bilmeyim, belki de", - dedi o.
Yerli sakinler Canköyde oktâbrniñ 17-nde olğan patlavlar aqqında bildirgen edi. Canköy saifeleri bu yıl avgust ayında olğan patlavlardan soñ snarâdlarnı mayınsızlaştıruv işleri aqqında bildirgen edi.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» atış ve «ava mudafaa sistemalarınıñ işi» aqqında ayta.
Avgustnıñ 16-nda Canköy rayonındaki silâ anbarlarında patlavlar oldı. Rusiye Mudafaa nazirligi buña «diversiya» dep ayttı.
Sentâbrniñ 7-nde Ukrayına Silâlı quvetleriniñ baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine qarşı Ukrayina arbiyleriniñ raketa darbelerini tanıdı. Ukrayina mudafaa nazirligi qırımlılarnı Qırımdaki Rusiye ordularınıñ yerlerini «eVoroğ» çat-botuna bildirmege çağırdı.
The New York Times neşiri Ukrayina memurınıñ malümatına esaslanıp, Qırımdaki patlavlar «elit Ukrayina arbiy bölügi» yardımınen kerçekleştirildi, dep bildirdi. Memur gizli qalmaq şartınen laf etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
