Dekabrniñ 29-nda Rusiyeniñ kütleviy ücüminde elâk olğanlarnıñ sayısı arttı. Dekabrniñ 30-nda saba Kıyiv akimiyeti Şevçenko rayonındaki anbarnıñ viranelerinden daa dört adamnıñ cesedi tapılğanını bildirdi.
''Dekabrniñ 29-nda paytahtqa yapılğan ücüm neticesinde elâk olğanlarnıñ sayısı 11-ge arttı... 32 insan yaralandı. Şimdiki vaqıtta olardan 17-si paytahtnıñ tibbiy müessiseleriniñ statsionarlarında buluna", - dep yazdı Kıyiv şeer başı Vitaliy Kliçko telegram-kanalında.
Zaporojjâ vilâyetiniñ akimiyeti de elâk olğanlarnıñ sayısı artqanını bildirdi, anda bir kün evelsi sekiz elâk olğan kişi aqqında malümat bar edi.
"Dekabrniñ 30-nda vilâyette matem künü ilân etildi, duşman ücümi Zaporojjâ sakinleriniñ 9 canını aldı'', - dep yazdı Zaporojjâ vilâyetiniñ arbiy memuriyetiniñ yolbaşçısı Yuriy Malasko telegramda.
Odesa vilâyetinde ve Dniproda da elâk olğanlar içün matem künü ilân etildi.
Dekabrniñ 29-na keçken gecesi Rusiye arbiyleri Ukrayinada soñki vaqıtları eñ büyük ücümlerden birini keçekleştirdi. Eñ azından 30 insan elâk oldı ve 160-tan ziyade yaralandı. Ukrayina Silâlı quvetleriniñ başı Valeriy Zalujnıy, Rusiye dekabrniñ 29-nda Ukrayinağa 158 raketa ve pilotsız uçaq attı, dep bildirdi. Kıyiv, Harkiv, Odesa, Lviv, Dnipro, Zaporojjâ ateşke oğradı. Bütün memlekette ava telükesi ilân etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
