Ukrayina daa keniş devlet bücetini maliyeleştirme paketi çerçivesinde Amerika Birleşken Devletlerinden 1,3 milliard dollar aldı, dep bildirdi Ukrayina baş naziri Denis Şmıgal.
"ABD prezidenti Joseph Bidenge emsalsiz destek içün minnetdarım. Sanktsiyalar, silâ ve para Ukrayinanıñ ğalebesini yaqınlaştıra. Yançıq daa keniş devlet bücetini maliyeleştirme paketi çerçivesinde Amerika Birleşken Devletlerinden 1,3 milliard dollar aldıq. Yollamanı ömürge keçirgen Dünya bankına operativ qararları ve Devid Malpasqa teşekkürler bildiremiz", - dep yazdı o Twiterde.
İyünniñ 27-nde "Büyük yedi devlet" gruppasınıñ memleketleri "Ukrayinağa maliye boşluqlarını qapatmaq ve ileride Ukrayina halqınıñ esas ihtiyaclarını temin etmek içün 2022 senesi bücet destegi içün 29,5 milliard dollar qadar grant bermege" azır olğanlarını bildirdiler.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
