Ukrayina Amerika tarafınıñ Rusiye ile cenkte ateşni 30 künge toqtatmaq teklifine razı oldı, dep aytıla Ukrayina ve ABD eyyetleriniñ Saudiy Arabistanda keçirgen muzakereler vaqtında qabul etilgen beyanatta.
«Ukrayina ABDniñ vaqtınca, 30 künlik ateşkesni kirsetmek teklifini qabul etmege azır olğanını bildirdi, Rusiye Federatsiyası qabul etse ve yerine ketirse, bu müddet taraflarnıñ razılığınen uzatıla bile. Amerika Rusiyege onıñ tarafından razılığı barışıqnıñ anahtarı olğanını yetkizecek», – dep aytıla Ukrayina prezidenti ofisi derc etken vesiqada.
Beyanatta qayd etilgenine köre, ABD «istihbarat malümatını paylaşuvdak pauzanı lâğu ete ve Ukrayina telükesizligine yardımnı yañıdan başlata».
«Eyyetler barışıq esnasınıñ bir parçası olaraq gumanitar ğayretlerni, hususan yuqarıda añılğan ateşkes vaqtında, şu cümleden cenk esirlerini deñiştirüv, tutulğan barışıqsever sakinlerniñ azat etilmesi ve zornen köçürilgen ukrayin balalarını qaytaruvnıñ emiyetini de muzakere ettiler», – dep qayd etti beyanat müellifleri.
Ukrayina ve Amerika eyyetleri muzakere gruppalarınıñ erkânını belgilemege ve «Ukrayinağa uzun müddetli telükesizlikni temin etecek turğun barışıq içün muzakerelerni acele başlatmağa» añlaşqanlar. ABD bu tekliflerni Rusiye vekillerinen muzakere etecek.
Ciddadaki körüşüvde Amerika tarafından ABD devlet kâtibi Marco Rubio ve Beyaz saraynıñ milliy telükesizlik mesleatçısı Michael Waltz iştirak etkenler. Ukrayinanı Andriy Yermak, prezident ofisiniñ yolbaşçısı, Tış işler naziri Andriy Sıbiğa, Mudafaa naziri Rustem Umerov ve Prezident ofisiniñ yolbaşçı muavini Pavel Palisa temsil etti.
Bundan evel Marco Rubio Ukrayina Rusiye ile cenkni toqtatuv añlaşması çerçivesinde topraq uzlaşuvlarına razı olmağa mecbur olacaq, dep ayttı. Rusiye de cenkni toqtatmaq ya da «bir şekilde» «yavaşlatmaq» içün «zor qararlar» qabul etmege mecbur olacaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
