Ukrayina, Avropa Birligi ve daa 36 memleket Rusiyeni öldürüvlerni toqtatmağa ve Ukrayinanen mündericeli muzakerelerge başlamağa çağırdılar. Bu aqta Ukrayina tış işler naziri Andriy Sıbiğa Nyu Yorkta BMT Baş Assambleyasınıñ meydanında bildirdi.
"Rusiyeniñ Ukrayinağa qarşı tecavuziy cenki insan azaplarına sebep olıp, global dünyanı kerginleştirgende biz mında birlikte turamız. Dört yıldan berli devam etken qanunsız, sebepsiz keñ kölemli basuv BMT nizamnamesiniñ qaba bozuluvıdır. Halqara toplulıq bu ciddiy bozuluvlarğa qarşı birdemlik köstermeli. Bu sebepten biz birdemligimizde birleşemiz ve Rusiyeni öldürüvlerni toqtatmağa ve Ukrayinanen mündericeli muzakerelerni başlamağa çağıramız", — dep aytıla beyanatta.
İmzalağanlar qayd eteler ki, vatandaş ealisine ya da vatandaş obyektlerine yapılğan ücümler arbiy cinayet sayıla ve Rusiye Ukrayina şeer ve qasabalarına yapılğan saylavsız raketa ve pilotsız ücümlerini deral toqtatmalı.