Ukrayina Mudafaa quvetleri 67 Rusiye uçucısızını urıp tüşürdi, daa 71 uçucısız tüşürildi, dep aytıla Ukrayina Silâlı quvetleriniñ Ava quvetleri haberinde fevralniñ 8-nde saba.
Ukrayina arbiyleriniñ malümatına köre, «cuma künü, fevralniñ 7-nde, saat 19:30-dan başlap rusiyeliler Ukrayinağa 139 Shahed darbe uçucısızı ve çeşit uçucısızlarnen bu yönelişlerden ücüm etti: Kursk, Orel, Millerovo, Brânsk, Şatalovo».
Ukrayina Silâlı quvetleri qayd etkenine köre, Rusiyeniñ darbesini Ukrayina Ava quvetleriniñ ve Mudafaa küçleriniñ aviatsiyası, zenit raketa orduları, radioelektron küreş bölükleri keri qaytardı.
«Cumaertesi künü, fevralniñ 8-nde, saat 09:00-da Kyiv, Harkiv, Poltava, Sumı, Çerkası, Çerniğiv, Kirovoğrad, Vinnıtsâ, Jitomır, Hmelnıtskıy, Zaporijjâ, Dnipropetrovsk, Donetsk ve Odesa vilâyetlerinde 67 uçucısıznıñ tüşçürilgeni tasdıqlandı. 71 duşman uçucısızı coyuldı (menfiy neticesiz)», – dep qayd etti Ukrayina Silâlı quvetleriniñ Ava küçleri.
Belli olğanına köre, Rusiye Federatsiyası quvetleriniñ ücümi neticesinde Sumı, Poltava, Dnipropetrovsk ve Kyiv vilâyetleri zarar kördi.
Rusiye arbiyleri çeşit silâlarnen muntazam sürette ukrayin regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
