Kyiv 101 insannı Rusiye esirliginden qaytardı: 100 arbiy ve bir vatandaş. Bu aqta Ukrayına prezidentiniñ ofis yolbaşçısı Andriy Yermak Telegram kanalında.
Sıñırcı, Milliy gvardiya hadimleri, asker ve Ukrayına silâlı quvetleriniñ serjantları evge qayttı. Vatandaş – Rusiye arbiyleri tutqan Energodar şeeriniñ birinci muavini.
«Bir çoq qaramanımız farqlı seviyelerde yaralanğan. İşimizni devam ettiremiz, taqım ve cenk esirlerine yanaşuv koordinatsion ştabı sağ olsunlar», – dep yazdı Yermak.
Azat etilgenlerniñ büyük qısmı – Mariupol imayecileri. 63 Azovstal imayecisi, Herson ve Kyiv yönelişlerinde mudafaada iştirak etken Ukrayına arbiyleri bar.
Evelki esir deñişüvi fevralniñ 4-nde oldı – Ukrayına 116 insannı evge qaytardı.
Ukrayınanıñ cenk esirlerine yanaşuv koordinatsion ştabınıñ malümatına köre, 2022 senesi 1596 arbiy ve vatandaş ukrayınalı Rusiye esirliginden azat etildi.
Rusiye tarafı da azat etilgen 101 esir aqqında bildirdi. Rusiye Mudafaa nazirliginiñ malümatına köre, Rusiye arbiy-naqliye aviatsiyasınıñ uçaqları olarnı tedaviylemek ve müessiselerniñ tibbiy bölüklerinde reabilitatsiyadan keçirmek içün Moskvağa alıp ketecek.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
