Rusiyeniñ Qırımdaki ükümet tarafdarı Telegram kanalları Bağçasaraydaki toyda ukrayin türküsini yañğıratqan dicey Ahtem Gemeciniñ "afu istemesi"niñ videosını yayınladılar.
Gemeci sentâbrniñ 10-nda "Arpat" restoranında qırımtatar toyunda dicey olıp çalışqanını bildirdi. Onıñ sözlerine köre, o, "mahsus operatsiya vaqtında (RF akimiyeti Ukrayinağa qarşı cenkni böyle adlandıra – QA) yañğıratqan türkü (ukrayin türküsi "Çervona kalına" – QA) ukrayin milletçileri tarafından Rusiyege qarşı çağıruv kibi qullanğanını bilmegen.
"Rusiye ve Qırım vatandaşlarından afu isteyim. Rusiyelilerge, Qırım sakinlerine ve bütün milletlerge qoltutam", - dedi Gemeci.
Evel Rusiye tarafdarı qırımlı bloger Aleksandr Talipov telegram kanalında onıñ malümatına köre sentâbrniñ 10-nda Bağçasarayda "Arpat" salonından olıp keçken toynıñ videosını yayınladı. Videoda toy musafirleri "Çervona kalına" ukrayin türküsini diñlep oynaylar. Bundvn ğayrı Talipov Aqmescitte olıp keçken daa bir toynıñ videosını yayınladı. Anda musafirler "Eurovision" yır yarışında ğalebe qazanğan Kalush Orchestra ukrayin taqımınıñ Stefania türküsini diñleyler.
Sentâbrniñ 12-nde Qırımnıñ Rusiye yolbaşçısı Sergey Aksönov Qırımda ukrayin türküleri, hususan "Çervona kalına" ve Stefania yanğırağan toylayrnıñ iştirakçilerini cinayet mesüliyeti ile tehdit etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
