"Serbest Qırımğa mektüpler" teşebbüsi çerçivesinde ukrayin gimnastı Anna Rizatdinova Rusiye tarafından 12 yıl apis cezasına maküm etilgen qırımlı Vadim Siruknıñ mektübini oqudı.
Bu aqta video Ukrayina prezidentiniñ Qırım Muhtar Cumhuriyetindeki temsilciliginiñ içtimaiy ağında derc etildi. Qayd etilgenine köre, al-azırda Siruk, Başkortostan Cumhuriyetiniñ 2-nci tüzetüv cezahanesinde buluna.
Qırımlı tiş problemlerinden, sıq suvuqlanğanından ve kerekli tibbiy yardımnıñ olmağanından şikâyet ete.
Siruknı Rusiye quvetçileri 2016 senesi yaqalağan edi. Onı Rusiyede yasaq etilgen "Hizb ut-Tahrir" islâm siyasiy teşkilâtına alâqası olğanında qabaatladılar.
"Serbest Qırımğa mektüpler" leyhasınıñ maqsadı Kremlniñ ukrayinalı esirleri aqqında hatırlatmaq, em de olarğa qol tutuv sözlerini bildirmektir. Bundan da ğayrı, mektüpler Rusiye apishaneleriniñ memuriyetlerine er bir Ukrayina vatandaşı müim olğanını ve cemiyet olarnıñ apishanede tutuluv şaraitlerini nezaret etkenini köstere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
