Ğarp Ukrayınağa em maddiy ceetten, em silânen yardım etmege devam etecek, dep bildirdi Almaniya kantsleri Olaf Şolts CNN intervyüsında.
O, ABD prezidenti Joe Biden ile muzakerelerni izaatlap, onı halqara munasebetlerden «pek haberdar» dep adlandırdı.
«Rusiye Ukrayınanıñ küçüni beklemedi… Ve Avropa, ABD ve bütün Ukrayına dostlarınıñ birligine, Ukrayınanı silânen temin etüvge yañlış qıymet kesti», – dedi o.
Kantsler şimdilik ne Rusiye, ne de Ukrayına cebede büyük muvafaqiyet qazanamadı, amma Ğarp Kyivge yardım etmege devam etecek, dedi:
«Ukrayınada neler olacağını bilmek pek zor, amma bir şey tam qala: Ukrayınağa em maddiy ve gumanitar usulnen, em silânen yardım etmege devam etecekmiz».
Jurnalistniñ «Qırımnı ve Donbasnıñ bir qısmını coyğanını tanıma» olsa, Ukrayına içün telükesizlik kefaletleri barmı sualine kantsler «ukrayınalılarsız qarar alınmaycaq», dep cevap berdi.
«Olarnıñ yerine qarar almaycaqmız. AB azası ola bileler, dep ayttıq ve olar talaplarğa köre ilerilemek içün çalışalar. Mence, olar barışıq vaqtına belli telükesizlik kefaletlerini teşkil etmege azır olğanımıznı bileler, amma anda daa barmadıq. Putinniñ bu istilâda ve imperiya tecavuzında muvafaqiyeti olmaycağını añlaması müim. Ordusını çekmek kerek. Bu muzakerelerniñ temeli ola, ukrayınalılarnıñ teklifine baqsañız, barışıqqa azır olğanlarını añlarısıñız, amma bir şeyler yapılmalı, ve bunı Putin yapmalı», – dep ayttı Almaniya ükümetiniñ yolbaşçısı.
Avropa Birligi Rusiye energiya taşıyıcılarından yavaş-yavaş vazgeçmege qarar bergen soñ, Şolts energetika vaziyetini de izaatladı. Onıñ aytqanına köre, Almaniya beklegeninden daa yahşı qış keçirdi:
«Bir yıl evelsi Almaniyağa ve diger Avropa memleketlerine Rusiyeden gaz kelmese, kimse vaziyetni iqtisadiyat ceetinden qolay keçirirmiz, dep tüşünmedi. Amma bunı yaptıq».
ABD prezidenti Joe Biden ve Almaniya kantsleri Olaf Şolts martnıñ 3-nde esasen Ukrayınadaki cenkke bağışlanğan muzakereler keçirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
