Ukrayına arbiyleri yanvarniñ 2-nde Rusiyeniñ 35 uçucısızınıñ episini ve 99 raketasından 72-sini urıp tüşürdi, dep bildirdi Ukrayına Silâlı Quvetleriniñ baş komandanı Valeriy Zalujnıy.
Onıñ aytqanına köre, ava mudafaa quvetleri 10 X-47M2 «Kinjal» aerobalistik raketasından 10-unı, 70 H-101/H-555/H-55 qanatlı raketasından 59-ını, üç «Kalibr» qanatlı raketasından üçüni urdı.
Zalujnıy qayd etkenine köre, yanvarniñ 2-nde Rusiye ordusı bir qaç kün evelsi, dekabrniñ 29-nda, olğanı kibi çeşit ücüm vastalarından ücümni tekrarladı.
Rusiye arbiyleri vatandaş ve kritik infrastruktura, sanayı ve arbiy obyektlerge ücüm etti, esas darbeler Kyivge keldi, dep qoştı Ukrayına Silâlı Quvetleriniñ baş komandanı. Rusiye quvetleri başta cenübiy-şarqiy yönelişten «şahedlernen» ücüm etti, saba ise strategik aviatsiyasını – Tu-95MS bombardımanlarını qullandı.
Rusiye Federatsiyasınıñ yanvarniñ 2-nde yapqan raketa darbeleri neticesinde eñ az dört insan elâk oldı – ekisi Kyiv vilâyetinde, birer kişi Kyivde ve Harkivde. 90-dan çoq insan yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
