Ukrayına telükesizlik hızmeti Novorossiysk körfezinde (Rusiyeniñ Krasnodar ülkesi) mahsus operatsiya keçirdi – bu aqta Azatlıq Radiosına avgustnıñ 4-nde mahsus hızmetteki menbalar bildirdi.
Neticede «Olenegorskiy gornâk» büyük desant gemisi zarar kördi. Subetdeş gemi körüngen video da paylaştı. Kamera gemige yaqınlaşqan taşıyıcığa yerleştirilgen, çatışma vaqtında video bite.
Menbalarnıñ malümatına köre, Ukrayına telükesizlik hızmetine ait bu deñizustü dron 450 kilogramm trotil taşıp, 100 kişilik ekipajı olğan gemige ücüm etti.
«Mahsus operatsiya Arbiy-deñiz quvetlerinen beraber yapıldı. Ücüm neticesinde «Olenegorskiy gornâk» ciddiy teşik aldı ve işini yapıp olamay. Rusiyelilerniñ «ücüm keri qaytarıldı» lafları yalan», – dep ayta Azatlıq Radiosınıñ subetdeşi.
Ukrayına quvet hızmetleri Rusiyege qarşı ve işğal altındaki Qırımda ücümlerni çoq izaatlamay. 2023 senesi mayıs ayında Ukrayına telükesizlik hızmetiniñ yolbaşçısı Vasıl Malük Ukrayına telükesizlik hızmeti işğal etilgen Qırımda Rusiye flotunıñ gemilerine deñiz dronlarınen ücüm etkenini aydınlattı.
Ukrayına Cenübi mudafaa quvetleriniñ birleşken koordinatsion matbuat merkeziniñ matbuat kâtibi Natalâ Ğumenük Azatlıq Radiosınıñ yayınında Novorossiysk yanında patlavlar Rusiyeniñ provokatsiyaları ola bile, dep tahmin etti.
Rusiye kütleviy haber vastaları Rusiye Mudafaa nazirliginiñ malümatına esaslanıp, avgustnıñ 4-nde saba Krasnodar ülkesinde, Novorossiysk rayonında, «Rusiye gemileri eki ukrayın ekipajsız katerniñ arbiy-deñiz bazasına qarşı yapqan ücümini keri qaytardı», dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
