Melitopol yönelişinde Ukrayına ordusı muvafaqiyetli olıp, 1,5 kilometr ileriledi, dep bildirdi Tavrik yönelişi mudafaa quvetleriniñ Birleşken matbuat merkeziniñ spikeri Valeriy Şerşen.
«Basqı neticesinde Tavrik yönelişiniñ mudafaa quvetleri muvafaqiyetli ola ve duşman zapt etken topraqqa 1,5 kilometr ileriledi. Melitopolde «Tavriya» gruppirovkasınıñ muvafaqiyetli ücüm areketleri aqqında aytıla. Şimdilik anda irişken sıñırlarımızdan yerleşemiz, yerler baqıla, mayınlar teşkerile, duşmannıñ yerlerine qarşı toplar çalışa. Tavrik yönelişiniñ askerleri ileri keçip, duşmannı yoq etmege devam ete ve cebeni tüzleştire», – dep tarif etti o, Ukrayına telemarafonınıñ yayınında.
Mudafaa quvetleriniñ Birleşken matbuat merkeziniñ vekili bu ilerilev ne qadar vaqıt içinde oldı aytmadı.
Bazarertesi künü belli olğanına köre, Ukrayına arbiyleri Donetsk vilâyetiniñ Rovnopol köyüni azat etti. Rovnopol ve civarları Zaporijjâ ve Donetsk vilâyetleri arasında yerleşe.
Ukrayına Silâlı quvetleriniñ Baş ştabı malümatına köre, Ukrayına mudafaa quvetleri üç yönelişte ücüm etmege devam ete: Melitopol, Berdânsk ve Liman.
Ukrayına mudafaa quvetleriniñ «Tavriya» operativ-strategik ordu gruppirovkasınıñ komandanı Oleksandr Tarnavskıy Ukrayına ordusı bazı cenübiy yönelişlerde «muvafaqiyetli ola», dep bildirdi.
Ukrayına ordusı soñki aftalarda Zaporijjâ vilâyetiniñ cenübinde ve Donetsk vilâyetiniñ şarqında sekiz köyni azat etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
