Ukrayına mudafaa quvetleri üç yönelişte ücüm etmege devam ete: Melitopol, Berdânsk ve Liman, dep bildirdi iyünniñ 22-nde Ukrayına Silâlı quvetleriniñ Baş ştabı.
«Rovnopil – Staromayske yönelişinde qısmen muvafaqiyetli oldıq, kelgen noqtalarda qalıp, duşmannıñ nişanlarına toplarnen ateş eteler. Duşman yedeklerini qullana, coyğanlarını almağa tırışa. Aynı vaqıtta büyük ğayıpları bar», – dep aytıla haberde.
Ukrayına Silâlı quvetleriniñ Baş ştabı bildirgenine köre, Ukrayına mudafaa quvetleriniñ Liman yönelişinde Beloğorivka – Dibrova yönelişinde ücüm areketleri yapıldı, «qısmen muvafaqiyetli oldı, irişken sıñırlarında qalalar».
Ukrayına prezidenti Volodımır Zelenskıy iyünniñ 21-nde BBCge intervyü berip, Ukrayınanıñ qarşı ücümi «istegeni kibi tez ketmey», dep ayttı.
«Bazı insanlar bunı Gollivud filmi saya, ve şimdi netice bekley. Böyle degil», – dep qayd etti o. Zelenskıy, yavaş ketken esnasnıñ sebeplerinden biri Rusiye ordusınıñ qoyğan mayınları ola, dep ayttı – Ukrayına toprağınıñ 200000 metr kâresi mayın tolu.
Ukrayına ordusı soñki aftalarda Zaporijjâ vilâyetiniñ cenübinde ve Donetsk vilâyetiniñ şarqında sekiz köyni azat etti.
Ukrayına Mudafaa nazirligi bildirgenine köre, Ukrayına Silâlı quvetleri Melitopol ve Berdânsk yönelişlerinde ücüm areketlerini devam ettire. Aynı vaqıtta müessise Ukrayına şarqındaki vaziyet zor, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
