Rusiyeniñ Ukrayınağa başlatqan cenkinde Ukrayına arbiyi, qırımtatarı Rustem Ablâtif elâk oldı. Bu aqta Qırımtatar Milliy Meclisiniñ azası Gayana Yüksel bildirdi.
«Rustem Ablâtif çeşit yıllarda bir qaç aliy tasil aldı, uquq oqudı, yabancı tiller ögrendi. Kyivde devlet hızmetinde çalıştı. Qırımğa qaytqan soñ cemaat faaliyetinen oğraştı. Eki yıl devamında biz İsmet Yükselnen idare etken «Qırım haberleri» agentligimizde (QHA) ingliz tilli saifeniñ muarriri oldı. Birinci Qırımtatar bayraq kününi azırlağanda teşkiliy körüşüvler agentlikniñ ofisinde edi, ve o, faal iştirak etken edi», – dep bildirdi Yüksel.
Yüksel aytqanına köre, Ablâtifniñ «pek keniş cemaat faaliyeti bar edi, tasil, uquqiy qoruv, Qırımdaki cemaat sektorınıñ inkişafı saasında leyhalarnı ve çeşit teşebbüslerni kerçekleştirdi, universitette uquq ocası olıp çalıştı».
«Ebet, 2014 senesi Qırım işğali bir çoq vatanperver ve faal içün olğanı kibi onıñ içün de zor oldı ve tuvğan Qırımını terk etmege mecbur edi. 2015 senesinden berli Rustem Ablâtif devletini qorup başladı. Cenk, ne yazıq ki, kerçek, lâyıq askerlerni ala», – dep qayd etti Yüksel.
Ukrayına prezidentiniñ Qırım Muhtar Cumhuriyetindeki temsilciligi Rustem Ablâtifniñ tuvğanları ve yaqınlarına teren taziyeler bildirdi.
Rustem Ablâtif cemaat erbabı ve siyasetşınas edi. Portaqal inqilâbında (2014 senesi noyabr-dekarb ayları) faal iştirak etti. «Euromaydan Krım» ve İtibar İnqilâbınıñ faal iştirakçisi edi.
2014 senesi Rusiye Qırımnı işğal etken soñ o, ATO/OOS alanına göñülli olaraq ketti. Ukrayına şarqınıñ mudafaası vaqtında Rustem Ablâtif bir qaç kere yaralanğan edi. Rusiye büyük ücüm yapqan soñ «Qırımlılarnıñ tarihiy vatanlarına qaytuv esnasında Türkiyedeki Qırım diasporası (1980-lerniñ soñu – 2000-lerniñ başı)» mevzusında tarih boyunca «felsefe doktorı» ilmiy unvanını aldı ve Ukrayına Silâlı quvetleriniñ göñüllilerine kene qoşuldı. Ablâtif qıral Daniil 24-ünci ayrı mehanizmleştirilgen brigadasına qoşuldı ve cenk areketlerinde iştirak etmege devam etti.
Avgustnıñ soñunda Ukrayına Silâlı quvetleriniñ baş komandanı Valeriy Zalujnıy Rusiyeniñ Ukrayınağa qarşı cenkinde aman-aman 9 biñ Ukrayına arbiyi elâk oldı, dep bildirdi.
Sentâbr ayında Ukrayına prezidenti Volodımır Zelenskıy Ukrayına bir künde tahminen 50 arbiyni coya, dep bildirdi.
Faal uruşlar vaziyetinde ğayıplarnen bağlı malümatnı teşkermek imkânsız ola.
