«Reyting» gruppasınıñ keçirgen içtimaiy soravınıñ neticelerine köre, Ukrainada Rusiyeniñ işğal etken Qırım yarımadasınıñ işğalden çıqarılmasını desteklegenlerniñ sayısı er yıl arta.
Soraştırılğanlarnıñ 68 faizi, Ukrainanıñ Qırımnıñ işğalden boşatılması içün bütün imkânlardan faydalanmalı, dep sayalar.
«21 faiz yarımadanıñ Rusiye nezaretine keçmesi ile razı olmaq tarafdarlarıdır. 2014 senesinden başlap, Qırımnıñ keri qaytarılmasınıñ tarafdarlarınıñ sayısı kettikçe arta», – dep yazıla araştırmada.
Soravnıñ neticelerine köre, 45 faiz vaqtınca işğal etilgen Qırımğa kene suv berip başlanmasına qoltutalar, 48 faiz ise buña qarşı.
Araştırmada Ukrainanıñ türlü viyaletlerinde yaşağan 18 yaştan insanlar iştirak etti. Episi olıp martnıñ 23-34 devamında 2500 insan soraştırıldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
