Ukraina Qırım işğal etilgen soñ Rusiye yarımadada faal milletlerara ayırım siyasetini keçire, tintüvler bitmey ve qırımtatarlar kütleviy şekilde tutula, dep bildirdi Birleşken Milletlerde.
«Qırım işğalinden soñ Rusiye qırımtatar ve ukrain cemiyetlerine qarşı medeniy silüv keniş kampaniyasını başlattı. Qırımda qavimlerni kollektiv cezalandırmasına başladı. Qırımda insanlar qanunsız tutula ve ğayıp ola, medeniyet ceetinden müim olğan toplaşuvlar yasaqlana, qırımtatar ve ukrain tillerinde tasil sıñırlana, kelişmegen cemiyetlerden kütleviy haber vastaları qorquzıla. Bu Halqara ırqiy ayırım şekillerini yoq etüv şartnamesiniñ kütleviy bozuluvı ola», – dep aytıla Ukraina Tış işler nazirliginiñ halqara uquq baş müdiri Oksana Zolotarevanıñ oktâbrniñ 28-nde Halqara Mahkeme maruzasınen bağlı BM Baş Assambleyasınıñ umumiy toplaşuvında aydınlatqan beyanatında.
O, Qırımtatar Milliy Meclisiniñ vekillerini taqip etüvni toqtatmağa ve yarımadada bu organnıñ işine mania olmamağa talap etken Halqara mahkemeniñ qararı aqqında hatırlattı.
«Dört yıldan çoq keçti ve añlaşıla ki, Rusiye Halqara mahkemeniñ qararınen Meclisniñ diskriminatsion yasağını toqtatmağa kerekmey, dep tüşüne. Bundan ğayrı, 2021 senesi iyünniñ 1-nde Moskva kontrolindeki Qırım Yuqarı mahkemesi Qırımtatar Milliy Meclisiniñ reisi Refat Çubarovnı 2014 senesi «qalabalıqlar» davası boyunca altı yılğa ğıyabiy şekilde üküm etti. Qırım gazetasınıñ baş muarriri Bekir Mamutovğa ise Meclis añılğan BM Baş kâtibiniñ maruzasını derc etkeni içün Rusiye işğalci akimiyeti para cezasını berdi. Qararnıñ diger qısmında Halqara mahkeme «ukrain tilinde tasilni temin etmege» talap etti ve bunıñ kerçekleştirilmegeninden emin olamız», – dep qayd etti Zolotareva.
O, Ukraina adından halqara toplulıqnı «Rusiye halqara uquq normalarına, Halqara mahkemeniñ mecburiy qararlarına riayet etmesini israr etmesine» çağırdı.
«Qırımda insan aqları saasında devam etken kergin vaziyetni köz ögüne alıp, Ukraina bu sessiyada Üçünci komitet ve Baş Assambleyağa bıltır qarar ve Baş kâtipniñ ve BM insan aqları Yuqarı komissarınıñ tevsiyeleri esasında «Vaqtınca işğal etilgen Qırım Muhtar Cumhuriyeti ve Aqyar şeerinde insan aqlarınıñ vaziyeti, Ukraina» qarar leyhasını bermege planlaştıra», – dep qoştı o.
Rusiye tarafı bu beyanatqa daa cevap bermedi.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirdi. Rusiye insan aqları vekâletlisi Tatyana Moskalkova Qırımda «milletlerara ve dinlerara barışıq» bar ve tamır halqqa yardım kösterile, dep aytqan edi.
Oktâbrniñ başında Ukraina prezidenti Volodımır Zelenskıy Qırımnen bağlı yañartılğan qararlar yılnıñ soñuna qadar Birleşken Milletlerge berilecek, dep bildirdi.
Zelenskıynıñ malümatına köre, BM Baş Assambleyası Qırım ve Donbas meselelerini al etken meydançıqlardan biri ola.
