Rusiye yırcısı Filipp Kirkorov Ukrainanı sağına, amma ilhaq etilgen Qırımda gastrol keçirmekten vazgeçmege niyeti yoq. Bu aqta o alıp barıcı Kseniya Sobçakqa intervyü bergende ayttı.
“Pek sağınam (Ukrainanı - QA). Onıñ içün em Qırımğa gastrollerge kelem”, - dedi Kirkorov.
Daa Qırım gastrolleri içün onıñ Amerika vizası qapatılacağından qorqmay, dep qoştı.
“Men bunıñ içün asıl az tüşünem. Amma, mesele şundaki, Qırımğa aynı şu insanlar kele. Olar evelkisi kibi muzıka diñlemege, raatlanmağa istey. Ne içün olarnı raatlıqsız ve türkülerimsiz qaldırmalım? Ne dep? Qaysı vizalar içün? Mahsus Qırımğa barmamaq doğru degil. Soñ ne? Kimge yengilce olur?”, - dedi Kirkorov.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
