Qırımtatar Milliy Meclisiniñ reisi Refat Çubarov Dnipro suvınıñ işğal etilgen Qırımğa berilüvinen bağlı adise-vaqialarğa eñ yaqın aylarda diqqatlı yanaşmağa çağırdı. O, Rusiye küç qullana bilecegini, «üçünci taraf» ise Ukrainanı yarımadanıñ suvnen teminlevini yañıdan başlatmasına qandıra bilecegini inkâr etmey.
Bu aqta o, Qırım.Aqiqatqa bildirdi.
«Rusiyeliler üçünci tarafnı celp ete bile. 2015 senesi böyle olğan edi, Qırımğa elektrik energiyasınıñ berilüvi toqtatılğan edi. O vaqıt hususan normand dördüniñ iştirakçileri vastacı oldı. Olar elektrik energiyasınıñ berilüvini temin etmek içün prezident (Petro – QA) Poroşenkoğa muracaat etken edi», – dedi Çubarov.
Onıñ qayd etkenine köre, Qırımda suv Rusiye ordusınıñ ihtiyaclarına yetmeycektir. Bu vaziyette, Meclis reisiniñ aytqanına köre, Rusiye tarafı Ukrainağa basqı yapa bile.
«Bir buçuq aydan Qırımda suv arbiy ihtiyaclarğa bile yetmeycegine esaslanam. Qırımğa başqa şekilde suv berilmese, olar (Rusiye akimiyeti – QA) küç qullana bile. Qırımğa suv berilmesi mümkün olğan yerge ordu keçe bile», – dep tahmin etti Çubarov.
Sabıq ABD Ukraina elçisi John Herbst Ukraina işğal etilgen Qırımda suv berilmesini toqtatuv siyasetini devam ettirmeli, dep ayttı, çünki bu Ukrainağa ait yarımada işğaliniñ toqatıluvı içün Rusiyege yapılğan basqınıñ müim qısmı ola.
Qırım suv anbarlarınıñ toluv seviyesi bir ayda 7,1 mln kubometrge eksildi. Bu aqta Rusiye kontrolindeki Qırım ükümetiniñ suv hocalığı ve melioratsiya devlet komiteti bildirdi.
Herson vilâyetiniñ devlet memuriyeti aprelniñ 4-nde Şimaliy-Qırım kanalı toldı dep, işğal etilgen Qırımğa kanaldan suv ketmey, dep işandırdı.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
