Yuqarı Rada Ukraina baş naziri vazifesine «Sluğa narodu» («Halq hızmetçisi») firqasınıñ namzeti Oleksiy Ğonçaruknıñ namzetine qoltuttı. 290 deputat qoltuttı, 27-si qarşı çıqtı. 35 parlament azası bitaraf qaldı, 66-sı rey bermedi.
Böylece halq deputatları Ğonçaruknı Nazirler Şurasınıñ reisi vazifesine teklif etken Volodımır Zelenskıynıñ teklifine qoltuttı, dep bildire Azatlıq Radiosı.
Ğonçaruk rey berüv ögüne çıqışta bulunıp, yañı ükümet ögünde olğan esas iqtisadiy meselelerni ayttı.
«Bu ükümetniñ işi qolay olmaycaq. Memleketimizde olğan bu problemlerni epiñiz bilesiñiz: miras qalğan borclar da bar. Bu obyektiv kerçeklik, kelecek sene er üçünci ğrıvnâ borclarğa ketecek. Bozulğan infrastruktura da mında – er kün «Ukrzaliznıtsâda» bir lokomotiv yana, yollarnı aytmağa acet yoq. Kommunal hocalıqnıñ vaziyeti fena, bazı şeerlerde kosmosnı qızdıramız, qızdıruvnıñ 50%-ı avağa kete», – dedi o.
Ğonçaruk iqtisadiy artuvnıñ yavaş olması paalı resurslar ve itibarnıñ yeterli olmamasınen bağlı, dedi. Nazirler Şurasınıñ taktik maqsadlarından biri kredit berüvniñ ucuzlaşmasını adlandırdı.
O, esap faizi eksilsin dep, Milliy bank ile dialognı öz vazifesi dep adlandıra, regulâtornıñ mustaqilligi esas mesele ola, dep qayd etti.
Ükümetniñ yañı yolbaşçısı halqara ortaqlarnen işbirligi aqqında da hatırlattı.
«Bir qaç aftadan Kyivde Halqara para fondunıñ missiyası olacaq, Ukraina ile üç-dört yıllıq yañı işbirligi programmasınen bağlı muzakereler keçirilecek», – dep ilân etti o.
Avgustnıñ 29-nda doquzıncı çağırılış Yuqarı Radanıñ birinci toplaşuvı keçirile.
Ukraina Yuqarı Radasınıñ reisi «Sluğa narodu» firqasınıñ Ukraina halq deputatı Dmıtro Razumkov oldı.
İyülniñ 21-nde olıp keçken nevbetten tış parlament saylavları neticesinde prezidentke qoltutqan «Sluğa narodu» firqası Yuqarı Radağa 250 deputatnı kirsetti. Siyasiy küçniñ diger parlament firqası ile koalitsiya şekillendirmeyip, ükümetni şekillendirmek fırsatı bar.
