Ukrainanıñ Rostov-na-Donu baş konsulı Taras Malışevskiy ve işdeşi – konsul Yuriy Dovgulâ Rostov-na-Donu ve vilâyetiniñ izolâtorında tutulğan on beş qırımtatarınen körüşti.
«Qırım birdemligi» haber etkenine köre, körüşüvler martnıñ 16-19-nda ötkerildi.
Qayd etilgenine köre, apiske alınğan Aqmescitteki ekinci «Hizb ut-Tahrir davasınıñ» faalleri Qırımdan SİZOğa kelgen soñ, Ukraina Baş konsullığınıñ diplomatları iş ziyaretlerine başladı.
Diplomatlar Akim Bekirov, Alim Karimov, Seyran Murtaza, Asan Yanikov, Raim Ayvazov, Remzi Bekirov, Riza İzetov, Şaban Umerov, Farhod Bazarov, Eldar Kantimirov, Ruslan Nagayev, Lenur Halilovnı ziyaret etti. Konsul Yuriy Dovgulâ Novoçerkassktaki SİZO-3-te endi üküm etilgen Qarasuvbazardaki «Hizb ut-Tahrir davasınıñ» mabüsleri Ayder Cepparov, Riza Ömerov ve Enver Ömerovnen körüşti. Olar istinafqa azırlana.
Avropa elçileri Rusiyeniñ Rostov-na-Donu mahkemesiniñ musulmanlar, qırımtatarlar, Qarasuvbazardaki «Hizb ut-Tahrir davasınıñ» mabüsleri Enver Ömerov, Riza Ömerov ve Ayder Cepparovnıñ ükümlerini takbih etti. Olar qırımlılarnı apisten azat etmege çağırdı.
«Memorial» aq qorçalayıcı merkezi «Hizb ut-Tahrir davası» boyunca apiske alınğan ve mahküm etilgen qırımtatarlarnı siyasiy mabüs dep tanıdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
