Ukraina Yuqarı Radasınıñ insan aqları vekâletlisi Lüdmila Denisova yañı tayin etilgen Ukrainadaki BM insan aqları monitoring missiyasınıñ yolbaşçısı Matilda Bogner ile iyülniñ 26-nda körüşip, Rusiyede ve ilhaq etilgen yarımadada tutulğan ukrainalı siyasiy mabüslerge qarşı yapılğan basqı aqqında tarif etti.
«Qırımtatarlar ve Ukraina vatandaşlarına qarşı repressiyalar, Qırımdaki Ukraina pravoslav kilsesiniñ ibadethanesine yapılğan ücüm, Edem Bekirov, Volodımır Baluh, Pavlo Ğrıbnıñ davaları – bu meselelerge diqqat ayırdım», – dep yazdı Denisova Facebook saifesinde.
Ombudsmenniñ aytqanına köre, o, Bognerge Rusiyede ve Qırımda qanunsız tutulğan Ukraina vatandaşlarınıñ davalarını berdi.
Ukraina Pravoslav kilsesiniñ Qırım arhiyepiskopı Klimentniñ bildirgenine köre, Aqmescitteki Ukraina Pravoslav kilsesi ibadethanesiniñ mülküni Qırımnıñ Rusiye mal-mülk nazirligine berüv aqqında mahkeme qararından soñ «sındırılıp çaypaldı».
Din adamınıñ aytqanına köre, Rusiye akimiyeti «Aqmescitteki Ukraina Pravoslav kilsesiniñ soborını yoq etkeni içün» sanktsiyalar bekley. Rusiye akimiyeti bu vaziyetni açıq sürette izaatlamay.
Ukrainadaki BM insan aqları monitoring missiyası Rusiye ilhaq etken Qırımnıñ Herson vilâyeti ile memuriy sıñırnı ziyaret etken edi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
