Ukraina Yuqarı Radası Ukrainağa qarşı silâlı tecavuz neticesinde azatlıqtan marum etilgen şahıslarnıñ ve qoranta azalarınıñ içtimaiy ve uquqiy qoruvı №6104 qanunını qabul etti. Bu aqta Ukraina parlamentiniñ saytı haber ete.
«Rey berüv neticesinde qanun leyhası 288 «ebet» reyinen ekinci oquvda ve umumen qabul etildi», – dep aytıla haberde.
Birinci oquvda qanun leyhasına 328 halq deputatı qoltuttı.
Berilgen malümatqa köre, qanun esir alınğan arbiylerge, vatandaş reinelerine, siyasiy mabüslerge yardım etmek içün qabul etildi.
Vesiqa Ukrainağa qarşı tecavuz neticesinde şahsiy azatlıqtan marum etüv faktını qayd etken Komissiya quruluvını ve vekâletlerini belgilevini közde tuta.
Qanun bir sıra içtimaiy kefaletni közde tuta. Hususan Ukrainağa qarşı silâlı tecavuz neticesinde azatlıqtan marum etilgeni qayd etilgen insanğa ya da qoranta azalarına er yıl devlet para yardımı berile.
2021 senesi sentâbr ayında Yuqarı Radağa Ukrainağa qarşı tecavuzdan zarar körgen siyasiy mabüsler ve qoranta azalarını içtimaiy ve uquqiy qoruvnen bağlı üç qanun leyhası berildi.
Halq deputatı Rustem Umerovnıñ bildirgenine köre, №6104 qanun leyhası «Ukrainağa qarşı silâlı zıddiyet neticesinde azatlıqtan marum etilgen şahıs statusını aluv mehanizmini qolaylaştırmağa ve siyasiy mabüs ve qoranta azalarınıñ qoşma içtimaiy ve uquqiy kefaletlerini kirsetmege» teklif ete.
Ukraina Yuqarı Radası Rusiye işğal etken Qırımda qırımtatarlarnıñ aqlarını qoruv Ukraina-Türkiye komissiyasını qurmağa teklif etken edi.
Ukraina prezidenti Volodımır Zelenskıy Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.
Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Rusiye insan aqları vekâletlisi Tatyana Moskalkova Qırımda «milletlerara ve dinlerara barışıq» bar ve tamır halqqa yardım kösterile, dep aytqan edi.
