Vatandaş serbestligi merkeziniñ reisi Oleksandra Matviyçuk aq qorçalayıcılarnıñ Frenkistan prezidenti Emmanuel Macronğa dekabrniñ 9-nda Parijde keçirilecek «normand körüşüvi» arfesinde yazğan mektübini derc etti. Frenkistan prezidentine yazılğan mektüpte Rusiye yolbaşçısı Vladimir Putinden ukrainalı siyasiy mabüslerni azat etmesini talap etmege rica etile.
«Rusiyeniñ Ukraina kibi Avropa siyaseti ve medeniyetine kirsetilmesini isteseñiz, aydut usullarından ve şantajdan vazgeçiñiz. Ukrainalı reinelerniñ azat etilüvini talap etiñiz. Ukrainanı uzlaşuvğa davet etmezden evel, Putinniñ laflarına inanmazdan evel, Moskva ile oyun qaidelerini belgileñiz. Endi cesürliknen başlağan vazifeni yerine ketirmeñizni rica etemiz: ukrainalı esirlerniñ azat etilüvi ve qorantalarına qaytması», – dep aytıla mektüpniñ metninde.
Aq qorçalayıcılar Kremlniñ qırımlı siyasiy mabüsleri Emir-Usein Kuku, Server Mustafayev, Nariman Memedeminovnıñ adlarını ayrıca qayd ete.
Dekabrniñ 9-nda «normand dördü» liderleriniñ üç yıl içinde ilk körüşüviniñ keçirilmesi planlaştırıla. Ukraina prezidenti Volodımır Zelenskıy, Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin Frenkistannıñ paytahtı Parijde muzakereler keçirecekler
Bundan evel Zelenskıy, Ukraina ve Rusiyede tutulğan adamlarnıñ «er kesni er keske» şeklinde «büyük» almaşuv olacağını bekley, dep qayd etti.
Qırımtatar faalleriniñ Rusiye apishanelerinden azat etilmesi Ukraina-Rusiye almaşuvınıñ ekinci basamağı olacaq, dep bildirdi sentâbr almaşuvından soñ Ukraina prezidenti Qırım.Aqiqatqa.
Ukraina ombudsmeni Lüdmila Denisovanıñ malümatına köre, Rusiye ve işğal etilgen Qırım apishanelerinde 87 qırımtatarı apiste tutula.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
