Rusiyeniñ Kopeysk koloniyasında tutulğan ukrainalı siyasiy mabüs, qırımlı anarhist Aleksandr Kolçenko 10 künge ceza izolâtorına avuştırıldı. Bu aqta «Prâmıy» ukrain telekanalınıñ yayınında Rusiye aq qorçalayıcısı Tatyana Şçur bildirdi.
«Yañı haberler bar – dekabrniñ 25-nde advokatımız oña bardı, onı muntazam sürette ziyaret eteler, ayda bir ya da eki kere. Er şey yerinde, ğaliba. Saşa er keske selâmlar aytıp, qoltutqanları içün teşekkürler bildirdi. Kün bir kere sport salonında olğanını, er şey yerinde olğanını ayta. Bugün saba haber keldi, Kolçenko formal bir sebepten 10 künge ceza izolâtorına qapatıla», – dep qoştı aq qorçalayıcı.
Onıñ fikirince, Kolçenko bayram künlerinde koloniyadaki rejim quvetleştirilgeni içün ceza izolâtorına avuştırıla bile, dep bildire UNIAN ukrain haber agentligi,
«Ne yazıq ki, apishanelerimizdeki qaideler böyle, koloniyalarda bayramlar sebebinden rejimler quvetleştirile. «Ağır» maddeler boyunca mahküm etilgenler profilaktika maqsadınen alandan çekip alına. Bunı rejim talap ete», – dedi aq qorçalayıcı.
Qırım.Aqiqat Aleksandr Kolçenkonıñ advokatından Rusiye aq qorçalayıcısınıñ aytqanlarınen bağlı izaat almağa tırışa.
Ukrainalı rejissör Oleg Sentsov ve qırımlı anarhist Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
Noyabrniñ 26-nda Ukraina prezidenti Petro Poroşenko Rusiyede apiste tutulğan qırımlı anarhist Aleksandr Kolçenkoğa doğğan künü munasebetinen muracaat etti. O, 29 yaşını toldurdı.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
