20 yaşında ukrainalı Pavlo Ğrıb Rusiyeniñ Şimaliy-Kavkaz okrugınıñ arbiy mahkemesinde ükmü seslendirilgende yaramadı. Oña acele yardım çağırıldı, oturışuv 45 daqqağa toqtatıldı, dep bildire «Nastoyaşçeye vremâ» telekanalı.
«Alım yaramay, mahkeme oturışuvında iştirak etip olamayım», – dep añlattı Pavlo. Onıñ aytqanına köre, SİZOda bulunğanda oña tibbiy yardım kösterilmegen edi.
Prokuror Pavlo Ğrıbnı terrorizmge yardım etkeni içün 6 yılğa üküm etmege talap etti.
«Ğrıb ağır cinayet işledi, faqat cinayetniñ tahqiq etilmesine faal sürette yardım etti. Ğrıbnı cinayet işlegeninde qabaatlı tanımağa teklif etem. 6 yıl umumiy rejim koloniyasında qalmasına üküm etmege rica etem», – dedi qabaatlayıcı.
2017 senesi avgustnıñ 24-nden Pavlo Ğrıb Beyazrusiyeniñ Gomelinde ğayıp oldı. Tuvğanlarınıñ bildirgenine köre, anda o, yaşağan Kyiv şeerinden internette tanış olğan Soçili qıznen körüşmek içün ketti. Pavlo (ğayıp olğanda 19 yaşında edi, şimdi – 20 yaşında) aynı künü Kyivge evge qaytacaq edi, amma ğayıp oldı. Tuvğanları ve imayesiniñ fikirince, onı Rusiye mahsus hızmetleri hırsızladı. Pavlo terrorizmge yardım etkeninde qabaatlana: qıznen yazışıp, Rusiye mekteplerinden birinde terakt yapmaq imkânını muzakere etken eken.
Pavlo Ğrıbnıñ babası İgor ve advokat Marina Dubrovina ukrainalı Rostov-na-Donu SİZOsına avuştırılğanda onı diger mabüsler kötekledi, dep bildirgen ediler. Ğrıbnıñ ukrainalı ekimi Vasiliy Prıtulanıñ aytqanına köre, Pavlonıñ portal gipertenziyası – iç qanamasına sebep ola bilecek yüksek qan basımı – bar.
