Aqyarda ekstremizmde qabaatlanıp Rusiye mahkemesi tarafından şartlı olaraq mahküm etilgen ukrainalı faal İgor Movenko Qırım yarımadasını terk etti, dep haber ete Qırım aq qorçalayıcı gruppası.
«2019 senesi iyünniñ 28-nde Movenko qorantasınen beraber Qırımnı terk etti, Aqyarda oña qarşı cinaiy taqip toqtatıldı. 2019 senesi mayısta Aqyar istinaf mahkemesiniñ 2018 senesi iyünniñ 26-nda çıqarğan ükümniñ şartlı apis cezası bitti», – dep aytıla aq qorçalayıcılarnıñ Facebook haberinde.
Ukraina ve işğal etilgen Qırımnıñ müessiseleri bu malümatnı şimdilik tasdıqlamadı. Qırım.Aqiqat tafsilâtlı malümat almağa tırışa.
2018 senesi iyünniñ 26-nda Kreml kontrolindeki Aqyar şeer mahkemesi Movenkonıñ ükmüni şartlı apis cezasına deñiştirmege qarar alıp, onı acele SİZOdan azat etmege emir etti. Faqat faalniñ özü oturışuvğa ketirilmegen edi.
2018 senesi mayısnıñ 4-nde Kreml kontrolindeki Aqyarnıñ Gagarin rayon mahkemesi ekstremizmde qabaatlanğan İgor Movenkonı 2 yılğa üküm etti.
Ukraina Tış işler nazirligi Aqyardaki Rusiye mahkemesiniñ qararına narazılıq bildirip, Movenkonıñ azat etilüvi içün küreşkenini aydınlatqan edi.
Daa evel Rusiye prokurorı aqyarlı içün eki yıl şartlı olaraq apis etilmesini istegen edi.
2016 senesi sentâbrniñ 9-nda internette aqyarlı İgor Movenkonı köteklegenlerini isbatlağan video peyda oldı. Onı zarar körgenniñ apayı çıqardı. Onıñ aytqanına köre, bir erkek Movenkonı ayaqmaşinasına yapıştırılğan Ukrainanıñ «Azov» batalyonı simvolikası içün kötekledi.
Ekimler İgor Movenkoda açıq qafatası yarası, baş miyi sarsıntısı, qafatası temeliniñ qırılması, çengeniñ qırılması, burun kemikleriniñ qapalı şekilde qırılması, köz almasınıñ yaralanmasını ve diger travmalarnı tayin ettiler.
O yıl dekabr ayında Movenko tutuldı ve Rusiye FSBsiniñ idaresine alıp ketirildi. Bundan soñ aqyarlı «VKontakte» içtimaiy ağında «Qırım – Ukrainadır» gruppasında qaldırğan bir qaç tefsir içün qabaatlandı.
