Ukrainanıñ Rostov-na-Donudaki baş konsulı Taras Malışevskiy ve Novoçerskassk şeeriniñ 3-ünci SİZO-daki konsulı Sergey Yürçenko "üçünci Bağçasaray gruppası" ve "ekinci Bağçasaray gruppası" davası boyunca mahküm etilgen Qırımlılarnen körüştiler. Bunıñ aqqında "Qırım birdemligi" cemaat bileşmesinde haber ettiler.
Yürçenkonıñ birazden aytıp bergeni kibi, Rustem Seytumerov ve Osman Seytumerov körme qabiliyetiniñ zayıflaşması içün ekim tarafından baqılmaq kerekler.
"Erkekler bu, kameranıñ qaranlığında pek çoq vesiqa oquğanlarından olğanını sayalar. Osman Seytumerov daa arqa ağrılarınen çekişe, mabüslerniñ episi tişleriniñ alından aytınalar. Baş konsullıq kerekli yoqlama talabı ile Rostov vilâyeti boyunca Cezalarnı icra etken Federal Hızmetiniñ Baş ofisine muracaat etmek niyetindedir", - dep yazıla bildirmede.
Qayd etile ki, mabüsler esasen dımlılıqtan, suvnıñ aqsap-aqsap işlevinden ve aşlarda domuz etiniñ berilmesinden şikâyet eteler.
"Aynı zamanda kameralarda buzdolap yoq. Televizor tek Osman Seytumerovnıñ kamerasında bar. SİZO-da tükân bar, amma mahsulatnıñ çeşitligi qıttır. Konsullar, mabüslerniñ episi maddiy yardımnı fevralniñ soñunda alacaqlarına inandırdılar", - dep haber etile.
Malışevskiy Server Mustafayev, Seyran Saliyev ve Servev Zekiryayev ile laf etken.
"Server Mustafayev böyle problemalarnı qayd etti: aş qıtı, tükânnıñ qarışıq çalışması, kezintiler muztazam olmaması, nezaret organlarğa berilgen şikâyetelrniñ toqtatılması, kerekli tibbiy yardımnıñ kösterilmesi ile bağlı qyınlıqlar. Taras Malışevskiy müessiseniñ müdiri ile laf etecegini bildirdi", - dep haber ettiler birleşmede.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi oktâbrniñ 29-nda Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa mahküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada, Timur İbragimov 17 yıl sert rejimli koloniyada, Seyran Saliyev16 yıl sert rejimli koloniyada qalmasına mahküm etildi. Ernes Ametov qabaatsız tanılıp, mahkemede azat etildi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
