Moskvanıñ Lefortovo rayon mahkemesiniñ zapt etilgen ukrainalı askerler davası oturışuvında qadı Albina Galimova üyle teneffüsini ilân etti. Ukrainalı askerler mahkeme salonından çıqarılğanda toplaşqanlarnıñ bir qısmı «Yaşasın Ukraina» dep qıçırdı, dep bildire Qırım.Aqiqat mühbiri.
Qadı Sergey Râbtsev saat 15-te qararını seslendirilmeli.
Daa evel haber etilgeni kibi, Moskvanıñ Lefortovo rayon mahkemesiniñ qadıları Galimova ve Râbtsev imayeniñ sekiz askeriniñ dava maddesini deñiştirmek muracaatını red etti. İmaye, Jeneva şartnamesine esaslanıp, tevqif müddetiniñ uzatılmasını arbiy mahkemede baqmağa talap etti.
Qırım yalısında FSB tarafından zapt etilgen 24 ukrainalı asker tahqiqatqa cenk esirleri olğanını bildirdi.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
