Cumaaqşamı künü, fevralniñ 28-nde, «Ukrainadaki saylav esnasını közetüv boyunca Ukrainanıñ bazı qanunlarına tüzetüv kirsetilüvine dair» qanun işke tüşürildi. İşbu qanun Rusiye közeticilerine Ukrainadaki saylavlarda iştirak etmege yasaq ete.
Qanun «Ukraina Prezidenti saylavları», «Ukraina millet vekilleriniñ saylavları», «Yerli saylavlar» qanunlarını deñiştire. İşbu qanunlarğa binaen, Ukraina Yuqarı Şurası tarafından istilâcı devlet ya da işğalci devlet olaraq tanılğan memleketniñ vatandaşları, halqara teşkilâtlarnıñ vekilleri çetel memleketleriniñ resmiy közeticisi olamaz. Bu yasaq Ukraina Yuqarı Radası tarafından istilâcı devlet ya da işğalci devlet olaraq tanılğan devletler tarafından teklif etilgen şahıslarğa da aittir.
Qanunnı Yuqarı Rada fevralniñ 7-nde qabul etti, prezident Petro Poroşenko fevralniñ 26-nda onı imzaladı. O, derc etilgen soñ ertesi künü işke tüşürile.
Fevralniñ 27-nde belli oldı ki, Avropadaki telükesizlik ve işbirligi teşkilâtınıñ Parlament assambleyası Ukrainadaki saylavlarda közeticiler missiyasına Rusiye vekillerini almadı.
