Ukrainada iyünniñ 7-nde 463 yañı COVID-19 koronavirus hastası qayd etildi, dep haber etile Ukraina milliy telükesizlik ve mudafaa şurasınıñ koronavirus qırğınlığınıñ tarqaluv monitoringi sistemasınıñ saytında.
Soñki künde 141 insan tüzeldi. Doquz kişi vefat etti, dep haber ete Azatlıq Radiosı.
Umumen Ukrainada qırğınlıq başlağanından berli 27462 hasta qayd etildi, 797 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
