Ukraina Nazirler şurası Veteranlar, vaqtınca işğal etilgen topraqlar ve memleket içinde köçip kelgen şahıslarnıñ meseleleri nazirligini eki müessisege böldi. Böyle qarar Nazirler şurasınıñ saytında derc etildi.
Ükümette kene Veteranlar meseleleri nazirligi peyda oldı, Vaqtınca işğal etilgen topraqlar meseleleri nazirligi ise Vaqtınca işğal etilgen topraqlarnıñ reintegratsiya meseleleri nazirligi adını aldı.
Veteranlar nazirliginiñ yolbaşçısı Sergey Bessarab, Reintegratsi naziri ise Aleksey Reznikov oldı.
2019 senesi sentâbr ayında Vaqtınca işğal etilgen topraqlar ve memleket içinde köçip kelgen şahıslar meseleleri nazirligi Veteranlar nazirliginen birleştirildi.
2020 senesi fevral ayında Ukraina nazirler şurasında Veteranlar, vaqtınca işğal etilgen topraqlar ve memleket içinde köçip kelgen şahıslar meseleleri nazirligini eki müessisege bölüv qararı alınğan edi: veteranlar ve topraqlarnıñ reintegratsiyası meseleleri.
Daa evel berilgen malümatqa köre, yañı Reintegratsiya nazirliginde Ukrainanıñ vaqtınca işğal etilgen topraqlarında insanlarnıñ aq ve serbestligini bozuv qaydı milliy merkezini ve «Qırım» reintegratsiya fondunı qurmağa niyetleneler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
